புதிய நுழைவு-வெளியேற்ற முறையை (Entry/Exit System – EES) முதல் நாளிலேயே செயல்படுத்த திட்டமிடப்பட்டிருந்த ஒரு சில ஐரோப்பிய ஒன்றிய விமான நிலையங்களில் பயணிகள் நீண்ட வரிசையில் காத்திருக்கும் நிலை ஏற்பட்டுள்ளது.
ஷெங்கன் பகுதி டிஜிட்டல் எல்லைகள் திட்டம் (Schengen Area Digital Borders Scheme) ஐரோப்பா முழுவதும் படிப்படியாக அறிமுகப்படுத்தப்பட்டு வருகிறது. இதில் செக் குடியரசு, எஸ்டோனியா மற்றும் லக்சம்பர்க் ஆகிய மூன்று நாடுகள், ஐரோப்பிய ஒன்றிய நாடுகளைச் சாராத (“மூன்றாம் நாட்டு”) குடிமக்கள் அனைவரின் கைரேகை மற்றும் புகைப்படங்களை பதிவு செய்யத் தொடங்கியுள்ளன.
Prague விமான நிலையம், வருகை தரும் பயணிகளுக்கு முழுமையாக இந்த நுழைவு-வெளியேற்ற முறையை செயல்படுத்தும் முக்கிய விமான நிலையமாக உள்ளது. ஞாயிற்றுக்கிழமை காலை செக் குடியரசின் தலைநகரில் தரையிறங்கிய இங்கிலாந்து விமானங்களில் வந்த பயணிகள், வழக்கமான சோதனை முறைகளை கடந்து செல்ல அதிக நேரம் எடுக்கவில்லை எனத் தெரிவித்தனர்.
உயிரி அளவீடுகளைப் (Biometrics) பதிவு செய்ய Prague விமான நிலையத்தின் டெர்மினல் 1-ல் பல எல்லைப் பதிவு இயந்திரங்கள் நிறுவப்பட்டுள்ளன. பயணிகள் பாஸ்போர்ட் கட்டுப்பாட்டு பகுதிக்குச் செல்வதற்கு முன், தங்கள் கைரேகைகள் மற்றும் முக அடையாளங்களை இந்த இயந்திரங்களில் பதிவு செய்ய வேண்டும் என்பதே இதன் நோக்கம்.
எனினும், விமான நிலைய அதிகாரிகள் பாஸ்போர்ட் ஊழியர்களுக்கு, இயந்திரங்களைப் பயன்படுத்துவதற்கு பதிலாக அவர்களது மேசைகளிலேயே உயிரி அளவீடுகளைப் பதிவு செய்யுமாறு அறிவுறுத்தினர்.
இதன் காரணமாக, பிரிட்டன், துருக்கி, எகிப்து மற்றும் ஐக்கிய அரபு எமிரேட்ஸ் போன்ற நாடுகளிலிருந்து வந்த பயணிகள் பாஸ்போர்ட் சரிபார்ப்புக்காக நீண்ட வரிசையில் காத்திருக்க வேண்டியதாயிற்று.
விமான நிலையத்தில் உள்நாட்டு மற்றும் வெளிநாட்டு பயணிகள் ஒரே இடத்தில் கூடினர். லீட்ஸ் பிராட்ஃபோர்டுக்கு விமானத்தில் செல்ல வந்த ஸ்டூவர்ட் லிண்டன் ரோட்ஸ் என்பவர், வரிசையில் காத்திருந்த பயணிகளைப் பற்றி கூறுகையில், “எல்லா இயந்திரங்களும் அணைக்கப்பட்டிருந்தன. பாஸ்போர்ட் கட்டுப்பாட்டு மேசையில் கைரேகை மற்றும் கண் பதிவு செய்ய ஒரு மணி நேரத்திற்கும் மேலானது” என்றார்.
லண்டனில் இருந்து வந்த பயணிகள், உயிரி அளவீடுகளைப் பதிவு செய்யவும், பாஸ்போர்ட்டை சரிபார்த்து முத்திரையிடவும் சுமார் ஒரு மணி நேரம் வரை காத்திருந்ததாகத் தெரிவித்தனர்.
ஆனால், லண்டனில் இருந்து சற்று தாமதமாக வந்த ஹாமில்டன் நாஷ் என்பவர் கூறுகையில், “நான் வரிசையில் சிக்கித் தவித்தேன். எந்த இயந்திரமும் வேலை செய்யவில்லை. வரிசையில் காத்திருக்க ஒரு மணி நேரம் முதல் 90 நிமிடங்கள் வரை ஆனது. விமான நிலையத்தில் ஏற்பட்ட நெரிசலைக் குறைக்க, ஆஸ்திரேலியா மற்றும் பிரிட்டன் பாஸ்போர்ட் வைத்திருப்பவர்களை ஐரோப்பிய ஒன்றிய நாடுகளுக்கான வழியைப் பயன்படுத்த அதிகாரிகள் அனுமதித்தனர்” என்றார்.
இந்த நுழைவு-வெளியேற்ற அமைப்பு, ஷெங்கன் பகுதிக்கு வரும் மற்றும் வெளியேறும் பயணிகள் இருவருக்கும் பொருந்தும். ஆனால் ஸ்டூவர்ட் லிண்டன் ரோட்ஸ் புறப்படும்போது தனது உயிரி அளவீடுகள் பதிவு செய்யப்படவில்லை என்று கூறினார். “வழக்கமான சோதனைதான் இருந்தது. பாஸ்போர்ட்டை முறைத்துப் பார்த்து முத்திரையிட்டார்கள்” என்றார் அவர்.
அக்டோபர் 12 முதல், ஷெங்கன் பகுதி உறுப்பு நாடுகள் தங்கள் எல்லைகளை EES முறைக்கு மாற்ற 180 நாட்கள் அவகாசம் உள்ளது. ஐரோப்பிய ஒன்றிய நாடுகளைச் சாராத குடிமக்களின் (பிரிட்டன் பாஸ்போர்ட் வைத்திருப்பவர்கள் உட்பட) முகங்கள் மற்றும் கைரேகைகள் ஐரோப்பிய ஒன்றியத்தின் மத்திய தரவுத்தளத்தில் சேமிக்கப்படும்.
இந்த புதிய முறையால் விமான நிலையங்களில் பயணிகள் நீண்ட நேரம் காத்திருக்க நேரிடும் என்று பயணத்துறை அதிகாரிகள் எச்சரித்துள்ளனர். ரியானேர் விமான நிறுவனத்தின் தலைமை நிர்வாக அதிகாரி மைக்கேல் ஓ’லேயரி கூறுகையில், “இது தவறாகப் போக நிறைய வாய்ப்புள்ளது” என்றார். மேலும், “குளிர்காலம் என்பதால் பெரிய அளவில் பாதிப்பு இருக்காது. ஆனால் குளிர்காலம் முழுவதும் இது ஏற்ற இறக்கமான நிலையிலேயே இருக்கும்” என்றார்.
பயண சங்கமான அப்டாவின் (APTA) தலைமை நிர்வாக அதிகாரி மார்க் டான்சர் கூறுகையில், “ஷெங்கன் பகுதிக்கு புதிய நுழைவு மற்றும் வெளியேறும் முறை நடைமுறைக்கு வருவதால் சில தாமதங்கள் ஏற்பட வாய்ப்புள்ளது” என்றார்.
அட்வான்டேஜ் டிராவல் பார்ட்னர்ஷிப் அமைப்பின் தலைமை நிர்வாக அதிகாரி ஜூலியா லோ பு-சையத், பயணிகள் விமான நிலையத்திற்கு வந்தவுடன், அடுத்தகட்ட பயணத்திற்கு மூன்று முதல் நான்கு மணி நேரம் வரை கால அவகாசம் இருக்குமாறு திட்டமிடுமாறு அறிவுறுத்தினார்.
பிபிசி டுடே நிகழ்ச்சியில் அவர் கூறுகையில், “பயணிகள் போதிய நேரம் ஒதுக்காமல், விமான நிலையத்தில் நெரிசல் ஏற்பட்டால், அது விரக்தி மற்றும் தாமதத்தை அதிகரிக்கும்” என்றார்.
ஐரோப்பிய ஒன்றியத்தின் பெரும்பாலான நாடுகள், ஐஸ்லாந்து, நார்வே மற்றும் சுவிட்சர்லாந்து ஆகிய நாடுகளை உள்ளடக்கிய ஷெங்கன் பகுதியில் 1,800 எல்லைக் கடப்புகள் உள்ளன. மேலும் ஆண்டுக்கு 500 மில்லியனுக்கும் அதிகமான பயணிகள் வந்து செல்கின்றனர்.
